Добивај вести на Viber
Среде лето штипјани останаа без вода за пиење поради дефект на главната водоводна линија. Населбите кои се наоѓаат во високите зони на градот се без вода. Како што информира директорот на ЈП „Исар“, Никола Мицевски, екипите цел ден го санираат дефектот кој настанал помеѓу главната филтер станица и населбата Дузлак. Тој најави подобрување на состојбите најрано во текот на утрешниот ден.
„Нашите екипи пристапија на отварање на дефектот и во текот на денот се надеваме дека ќе успееме да го санираме овој проблем. Се надевам дека до утре во текот на претпладневните часови ќе имаме нормализирано водоснабдување. Водоснабдувањето е пренасочено кон ниските зони и вода за пиење ќе немаат населбите познати како Блоковите 85, 91 и 2000 и високите зони како што е населбата Пребег“, соопшт Мицевски.
Според прогнозите на „Исар“, повеќе од 30% од граѓаните во Штип ќе останат без вода, а надлежните побараа од граѓаните во пониските зони рационално да ја користат водата.
Дефектот на главната водоводна линија е прв ваков сериозен проблем годинава во Штип.