Стартува работењето на дежурниот педијатриски пункт во „Јане Сандански“

Добивај вести на Viber

Од денеска почнува со работа дежурниот педијатарски пункт во Поликлиниката „Јане Сандански“ во Скопје каде за здравствените потреби на граѓаните ќе бидат ангажирани педијатри од Клиниката за детски болести, Институтот за белодробни заболувања кај децата-Козле, Здравствен дом Скопје, како и педијатри кои имаат договор со ФЗОМ како приватни здравствени установи. Предвидено е  пунктот да работи секој ден од понеделник до сабота од 19:30 до 23 часот, а во недела од 8 до 23 часот. На пунктот, кој е надополнување на дежурните служби во рамки на клиниката за детски болести и Институтот за белодробни заболувања кај децата-Козле во Скопје, ќе се вршат амбулантски прегледи на деца кои досега како итни случаи се третирале на универзитетската клиника. Во функција на педијатрискиот пункт има и дежурна лабораторија, која е особено значајна за воспоставување брза диференцијална дијагностика во педијатријата. На овој начин, ќе се утврди дали има потреба детето да се упатува на повисоко ниво на здравствена заштита, или пак конкретната здравствена услуга може да ја обезбеди педијатарот во пунктот. За преглед во педијатрискиот пункт не е потребен упат, а секое дете ќе добие брза и квалитетна здравствена услуга од високостручен кадар во оваа област-лекар специјалист по педијатрија.