СТАТИСТИКА ЌЕ ПОПОЛНУВА 25 ПОЗИЦИИ: Платите се движат од 25 до 35 илјади денари, еве ги деталите

Добивај вести на Viber

Државниот завод за статистика објави два огласи на својата веб страна со кои ќе пополни дури 25 работни места. Со еден од огласите ќе се пополнат 24 позиции, а со вториот едно место. Огласите откриваат дека платите на вработените ќе се движат од 25 илјади денари, па се до 34.400, секако зависно од позицијата која ќе ја добијат. Станува збор за нето примања, што значи толку ќе им легнуваат на сметките.

Огласот открива дека сите кои ќе конкурираат мора да ги исполнат најпрво општите услови за работа во администрација, значи да се државјани на Македонија, полнолетни, без забрана за дејност, солидно познавање работа со компјутери... Дополнително зависно од позицијата за која конкурираат, кандидатите треба да имаат високо образование, соодветно за работата, но и солидно познавање на еден од светските јазици, англиски, германски или француски.

Во суштина во Државниот завод за статистика се бараат кандидати кои ќе пополнат позиција Советник за сектор за нефинансиски претпријатија – одделение за пресметка на БДП по производен метод и секторски национални сметки чија плата ќе достигнува 34.328 денари. Се бара кандидат и за Соработник за сектор држава – за иста позиција но со пониска плата, односно 29.989 денари. Со огласот се бара и Виш соработник за надворешна трговија чија плата е благо над 30 илјади, па Советник за цени на земјоделски производи со плата од 34.382 денари, Виш соработник за цени на производители на индустриски производи со плата од 30.868 денари, но и Виш соработник за туризам, внатрешна трговија и услуги кој ќе добива иста плата како и претходната позиција.

Од испразнетите позиции во Државниот завод за статистика, со овој оглас треба да се пополнат и позициите Советник за статистички деловен регистар, Советник за демографија на претпријатија, Виш соработник за транспорт, Советник за енергетика...

Деталите за овој оглас може да ги видите на линков: https://www.stat.gov.mk/Oglasi/InterenOglas_01_2024.pdf

Од друга страна, ДЗС има распишано уште еден оглас, со кој е предвидено да ја пополнат позицијата Раководител на Одделение за управување со човечки ресурси – Одделение за управување со човечки ресурси. Кандидатите мора да имаат високо образование, да знае странски јазик, но и компјутери, потврда за положен испит за административно управување, четири години работно искуство во областа, една година работно искуство во јавен сектор... Платата за оваа позиција е 38.248 денари. Деталите на овој линк - https://www.stat.gov.mk/Oglasi/InterenOglas_02_2024.pdf.

Роковите за пријавување се десет дена од објава на огласите, но во нив нема податоци дали станува збор за договори на одреден период, или пак за вработување без рокови, односно на неопределено време.

П. О.