СТАВ, ПРОФЕСОР Биљали: Капитулацијата на Груевски во својот двор е шанса самата партија да добие нормално водство

Добивај вести на Viber

„Не сум многу сигурен дека и наводното пропаѓање на преговорите меѓу ДПМНЕ и ДУИ за формирање нова влада не е некој договорен блеф. Тоа е нешто што повеќе припаѓа на сферата на актерството“, вели во кратка изјава универзитетскиот професор Мерсел Биљали коментирајќи ја актуелната политичка состојба, неуспешниот обид на екс премиерот Никола Груевски да добие парламентарно мнозинство, и што да очекуваме на политичката сцена.

Професорот Биљали смета дека ДУИ вистински ќе се одлепи од ДПМНЕ само кога ќе биде сигурна дека веќе не е опасна.

„Нив ги врзувале многу работи, што вклучувајќи и тоа што е сосема видливо а е астрономски. Мислам дека тие и понатаму сонуваат за таква црно-финасиска идила, и секоја промена е ризик за едни луѓе од двете партии. Целата таа игра ја потпомага една статична фигура што ние од формални причини го нарекуваме шеф на државата“, вели тој.

Професорот Биљали е оптимист дека Македонија наскоро ќе има Влада.

„Сега мислам дека Заев има далеку далеку повеќе коалициски капацитет со другите партии и етникуми, така што јас цврсто верувам дека наскоро ќе имаме нова влада. 

Дури и при таков празноглавно-плавушки експеримент дека ДПМНЕ може пак да го добие мандатот со друг мандатар, е само одложување на неколку десетина дена што е од голема штета. Водството на ДПМНЕ е пред тотална капитулација и во својот двор, така што реформите ќе и помогнат и на самата партија на Груевски оти има шанси да добие нормално водство“, дециден е Биљали .

И.С.