Ставрески: Ако опозицијата го закочи кредитот од Светска банка, Владата ќе земе пари од друго место

Добивај вести на Viber

Вицепремиерот и министер за финансии Зоран Ставрески,уште еднаш апелираше до опозицијата да не го кочи носењето на Буџетот, како и задолжувањето кај Светска банка, укажувајќи дека договорените заеми се со исклучително поволни услови и оти во спротивно Македонија ќе има штета од 84 милиони евра.

Според Вицепремиерот преговорите со Светска банка и одобрените финансии се договорани со цел да се поддржат реформите во Република Македонија и се дадени од СБ врз основа на анализи на сите економски преформанси на Македонија како и резултатите во минатото и проекциите за во иднината. Тој појасни дека првиот заем од 50 милиони американски долари е со камата од само 0,6 проценти, додека Вториот заем од СБ, којшто е практично од деловни банки, но со гаранција од СБ, ни ги даваат заради добрите перформанси и дисциплината и во делот на буџетската политика и фискалниот дефицит. „Вториот заем ќе го добиеме со камата пониска од четири проценти. Во вакви околности да се добие заем со таква камата и којшто овозможува да се финансираат сите потреби на државата вклучително и исплата на обврските настанати во време на владите на СДСМ, но ние како држава ги признаваме прифаќаме и ги сервисраме, навистина е политички неодговорно и штетно“, истакна вицепремиерот. Замислете, додаде тој, како изгледаше за една политичка партија да добие таков дециден одговор од меѓународна финансиска институција која професионално и стручно ви кажа дека долгот на РМ е умерен и оти здраво се водат финансиите и буџетската политика е рационална и разумна. Според Ставрески, ако опозицијата продолжи со опструирање на заемите во Парламентот тогаш ќе мора да се пристапи кон другата алтернатива, односно да се излезе на меѓународниот пазар на капитал со еврообврзница или со доларска обврзница којашто сигурно носи камата која е два пати и повеќе повисока од просечната камата на средства, што ќе и донесе големе штета на Македонија од точно 84 милиони.