Ставрески: Кон крајот на август ќе се знае дали ќе има ребаланс на Буџетот

Добивај вести на Viber

Веќе се крои буџетот за наредната година, а Министерството за финансии ги почнало потребните разговори и подготовки со останатите ресори, изјави денеска вицепремиерот Зоран Ставрески. Запрашан за можноста за ребаланс на буџетот за тековната година, тој појасни дека по истекот на месецот ќе се види дали ќе има потреба од какви било корекции. „Ќе почекаме да видиме како ќе помине август и тогаш ќе видиме дали има потреба од какви било корекции. Но, она што е најзначајно е дека во целина реализацијата на Буџетот и на приходите е во рамки на планираното“, рече Ставрески . Според вицепремиерот, завршувањето на долготрајната рецесија во еврозоната е позитивен сигнал, но и Владата и стопанството треба да останат активни. „Во тој контекст македонското стопанство може да смета дека ќе има зголемена побарувачка од земјите во еврзооната, но тоа нема да се случи нагло, односно ќе има уште предизвици. Треба сите заеднички да продолжиме со напорите, со динамиката на реформи, со подобрувањето на бизнис климата, со обезбедувањето евтини кредити. Да останеме активни и ние како Влада, а и фирмите бидејќи нема простор за преголемо опуштање. Но, треба да се биде малку поголем оптмист со оглед на позитивните резулатати во европската економија“, изјави Ставрески.