Ставрески: Нема да има корекција на даноците

Добивај вести на Viber

Корекција на даноците во Република Македонија нема да има, оваа Влада ќе се задржи на политиката на најниски даноци во Европа, ова го изјави  вицепремиерот и министер за финансии Зоран Ставрески, одговарајќи на новинарско прашање на денешната прес-конференција. - Даночната политика во Република Македонија е најповолна во Европа, така што корекција на даноците нема да има. Ќе се обидеме да ги задржиме на ова ниво за разлика од сите други земји коишто во меѓувреме ги зголемија, нагласи министерот Ставрески. Инаку, вчера Академик Таки Фити, за 24 вести рече дека Македонија средно рочно ќе се соочи со зголемување на даноците, поради преголемите непродуктивни трошења. - Ако вложите еден денар тој треба да додаде 2 денари на БДП или при потрошени 100 милиони евра,  треба да се вратат 200 милиони евра. Ако добар дел од парите се за непродуктивни цели и дел од парите завршуваат надвор, не само што нема поврат на парите туку  може да сте  во минус. Притисокот врз буџетот, со зголемени плати, пензии и социјални транфери нема да може да се издржи долго. И Македонија ќе се соочи со состојба да крати од трошењата. Не може да се оди со зголемување на пензиите ако знаеме дека бројот на пензионери е голем. Второ ако државата кумулира долгови, ако економијата не тргне, а ратите доспеваат тогаш ќе треба да се земаат нови кредити, состојба што не е одржлива,  или ќе се соочиме со состојба на зголемување на даноци, изјави Академик Таки Фити.