Ставрески со ребалансот ветува повеќе пари за автопати

Добивај вести на Viber

Ребалансот на Буџетот за 2014 година ќе помогне за интензивирање на реализацијата на инфраструктурните проекти, особено на Коридорот 10 и задржување на фискалната дисциплина и поддршката на економијата, вети вицепремиерот и министер за финансии Зоран Ставрески. Тој го образложи ребалансот пред пратениците, кои денеска треба да расправаат за прекројувањето на државната каса. Според Ставрески се врши корекција и на приходната и на расходната страна која е помала од два проценти и затоа „ова претставува мал ребаланс, но потребен за да се заврши годината онака како што се планираше“. Најголемата промена што се прави на расходната страна е обезбедување дополнителни средства од 1,42 милијарди денари за изградба на Коридорот 10, односно автопатот Демир Капија-Смоквица кој се одвива со поинтензивна динамика од предвидувањата и е планирано да заврши до август 2016 година. Токму додавањето средства во оваа ставка, според Ставрески, предизвикува и зголемување на буџетски дефицит кој сега се позиционира на 3,9 проценти. Како резултат на состојбите во економијата во првиот квартал и случувањата во индустриското производство извршено е и ревидирање на проекцијата на БДП која, како што рече министерот за финансии, оди нагоре од 3,2 на 3,5 проценти „со потенцијал да биде и повисок од 3,5 проценти“. Во образложението по ребалансот министерот Ставрески потенцира дека вкупниот долг на централанта влада заклучно со јули 2014 година изнесува 40,8 проценти од БДП со што Македонија останува меѓу 10-те земји во Европа со најмало ниво на долг, односно со умерено ниво на задолженост и оти таа политика ќе продолжи и во следниот период. Притоа, тој смета дека со средствата од еврообврзницата издадена во јули обезбедени се доволни средства за финансирање на буџетот и она што следи во наредните години. Според Деловникот, расправата за ребалансот на буџетот може да трае најмногу пет дена.