Сточарот Мачевски разгледува тужба против „Анима Мунди“: Врзувањето јагне е традиција

Добивај вести на Viber

Сточарот Александар Мачевски од пехчевското село Робово, во врска со написот на Анима Мунди за инспектор што малтретира јагне изјави дека снимката е лична и приватна направена во неговиот дом како традиција што секоја година се прави во домот на сточарите кога ги продаваат јагнињата.

- Се свири песната „Изгубеното јагне” и се донесува јагне како адет и традиција и мора да биде врзано. Ако може да забележите јагнето не е малтретирано, мачено и ,заколено” и после песната е пуштено кај неговата мајка затоа што се верува дека на тој начин ќе има повеќе јагниња следната година. Со вашиот натпис ми го нарушувате угледот на мене лично и на моите гости. Доколку не се повлече и избрише натписот приморан сум да преземам правни дејствија против здружението, вели Мачевски во својата изјава.

Александар Мачевски заедно со неговите браќа се сопственици на фармата „Мачевските деца” која се занимава со одгледување говеда, овци и крави, која како семеен бизнис егзистира од 2006 година.

За инспекторот за благосостојба на животните, Агенцијата за храна и ветеринарство најави разговор со вработениот, додека министерот за земјоделство Љупчо Николовски објави дека ќе биде разгледана евентуална санкција за него.