Стојанче Ангелов: Најдов двајца пилоти, од есен ќе започнат со обука

Добивај вести на Viber

Директорот на Агенцијата за заштита и спасување, Стојанче Ангелов, во емисијата „Трилинг“ реферираше дека сите три противпожарни авиони ер-трактори се во функција, со тоа што во моментов во Македонија е само еден од нив, вториот ќе пристигне следната недела, а понатаму и третиот.

- Се направија дополнителни сервиси поради староста и користењето од минатите години. Требаше да бидат извршени некои дополнителни сервиси, за леталата да бидат безбедни, рече Ангелов.

Поранешниот директор на Центарот за управување со кризи додаде дека следната недела ќе се потпише договор за ангажирање на двајцата пензионирани пилоти.

- Следната недела ќе се потпише договор со двајцата пензионирани пилоти на ер-трактори и со тоа ќе имаме тројца пилоти на располагање. Веќе работам на наоѓање на нови пилоти и можам да кажам дека со двајца имам договорено од есен да се стартува со обука. Тоа е периодот кога најрано може да се стартува со обука, изјави Ангелов.

Тој додаде дека е во потрага по трет нов пилот кој има барем 500-тини часа летање зад себе и дека очекува за следната година нивниот број да биде шестмина кои би работеле сменски преку целиот ден.