Стопанска банка – Битола оствари добивка од 11 милиони денари!

Добивај вести на Viber

Стопанска банка Битола оствари позитивен финансиски резултат во првите девет месеци од годинава. Еве што се вели во соопштението од банката објавено на Македонска берза. Во периодот јануари – септември 2013 година, Стопанска банка а.д. Битола успеа значително да го подобри финансискиот резултат така што после подолг временски период оствари нето добивка во износ од 11,12 милиони денари што е за 268,2 милиони денари подобар резултат од остварениот во истиот период минатата година кога загубата на Банката изнесуваше 257,1 милиони денари. Она што е уште позначајно е што овој резултат Банката го постигнува во услови на неповолна економска состојба во земјата и светот, кога финансиските институции сеуште ги трпат последиците од светската финансиска криза. Позитивниот финансиски резултат пред се се должи на ослободување на исправка на вредноста на финансиските средства на нето основа во износ од 304,2 милиони денари што е одраз на активностите на Банката за наплата на претходно оштетените побарувања и намалување на нефункционалните кредити. Нето приходите од камата се зголемени за 7,5 милиони денари споредено со 30.09.2012 година и истите се резултат на позначајно намалување на расходите за камати во однос на намалувањето на приходите од камати. Намалувањето на приходите по камати, во услови на зголемено бруто кредитно портфолио, е резултат на пониски активни каматни стапки следствено на намалувањето на референтната каматна стапка на НБРМ. Приходите од провизи и надомести се зголемени за 37,3% додека расходите за провизии и надомести се намалени за 37,8% така што нето ефектот е двојно поголем од истиот остварен во текот на разгледуваниот период од минатата година. Исто така во разгледуваниот период Банката оствари приходи по основ на дивиденди и капитални добивки од продажба на дел од превземениот имот што придонесе за зголемување од 75,7% на останатите приходи од дејноста. Паралелно со зголемувањето на приходните позиции, зголемување има и кај трошоците за вработените, амортизацијата и останатите расходи од деjноста и тоа 3,0%, 7,3% и 13,5% соодветно. Загубите поради оштетување на нефинансиските средства, на нето основа, се повисоки споредено со минатата година главно како резултат на постапување согласно Одлуката од НБРМ за сметководствениот и регулаторниот третман на средствата преземени врз основа на ненаплатени побарувања. Во идниот период, Стопанска банка а.д. Битола ќе продолжи со преземање на соодветни мерки и активности за наплата на нефункционалните кредити и продажба на превземениот имот. Истовремено, Банката ќе настојува да го одржи трендот на раст на нето приходите од камати и провизии со што би се создале услови за дополнително подобрување на финансискиот резултат.