„Стопанска банка“ Скопје прави ќар од 81.170 евра просечно дневно!

Добивај вести на Viber

Периодот јули-септември е исклучително добар за најголемата банка и во него нето добивката пораснала за 530,4 милиони денари (8,6 милиони евра) до износ од 1,35 милијарди денари (21,9) милиони евра „Стопанска банка“ Скопје има нето добивка од 530,4 милиони денари ( 8,6 милиони евра) за период од три месеци во интервалот јули – септември годинава, покажува билансот на успех на најголемата банка во земјава објавен на интернет страницата на Македонската берза за хартии од вредност. Со третиот квартал вкупната добивка на банката за периодот јануари-септември изнесува 1,35 милијарди денари (21,9 милиони евра). Очигледно е дека третиот квартал односно периодот јули-септември е најуспешниот профитен период годинава затоа што добивката остварена во него е поголема за 1,3 милиони евра односно 15 отсто повеќе од просечната квартална добивка на таа банка. Врз основа на најновите финансиски резултати добивката по акција изнесува 77 денари. Во споредба со последната пазарна цена постигната на берзата оваа акција носи апроксимативна добивка од 20 отсто од последната пазарна цена. Билансот на успех покажува дека оваа банка за првите девет месеци годинава има приходи од камати во износ од 3,5 милијарди денари, а 2,32 милијадри денари се нето приход од камата. Во првите девет месеци годинава „Стопанска банка“ Скопје има просечен дневен нето приход од камати во износ од 139.490 евра. Во другата,помала, приходна ставка оваа банка т.е. од провизии и надоместоци оваа банка во првите девет месеци има нето приход од 732,1 милиони денари што е раст од 8,6 отсто во споредба со истиот период лани. Бројките покажуваат дека менаџментот на банката работел паралелно и за зголемување на пазарното учество, но и на резервациите за исправка на вредноста кои во првите девет месеци годинава се 408,5 милиони денари и се пониски за 245 милиони денари во споредба со јануари-септември лани. Од почетокот на годинава до крај на септември загубите заради оштетување на нефинансиски средства се зголемени за 31 милиони денари во однос на истите од лани и заклучно со септември годинава изнесуваат 89,1 милиони денари. Од анализата на билансот особено внимание заклужуваат перформансите на банката за периодот јули-септември. Нето приходот од камати во овој интервал е зголемен за 800 милиони денари со што го надминува кварталниот просек за првите две тромесечја годинава. Исто така има голем раст на нето приходот од провизии и надоместоци во однос на кварталниот просек за првите две тромесечја. Во перидот јануари-јуни вкупниот нето износ од провизии и надоместоци е 478,8 милиони денари, а во периодот јули-септември тој изнесува 311 милиони денари.Токму заради тие параметри и добивката бележи солиден раст од 530,4 милиони денари и од износ од 819,6 милиони денари на крајот на јуни, на крајот на септември изнесува 1,35 милијарди денари што е раст од 39,4 отсто во споредба со добивката остварена во првите девет месеци лани. Акцијата на оваа банка која котира на сегментот задолжителна котација на Македонската берза во последниве два месеци станува се поатрактивна за инвеститорите. Во голем дел интересот е насочен во таа акција заради солидните перформанси на банката во нејзиното работење. Но во одредена мера, некои инвеститори настапуваат шпекулативно и купуваат акции во очекување на можна продажба на македонската банка.