„Стопанска банка“ Скопје со профит од 13,3 милиони евра за половина година!

Добивај вести на Viber

Просечниот дневен нето приход од камата на оваа банка е 137.250 евра! „Стопанска банка“ Скопје има профит од 819,6 милиони денари (13,3 милиони евра) на половина од годинава, покажуваат податоците од билансот на успех на таа банка. Најголемата банка ја зголемила речиси двојно добивката што ја имаше на крајот на минатата година. Добивката за полугодието достигна 83 отсто од износот на добивката на оваа банка за цела 2013 година. За првото полугодие чистата добивка по акција изнесува 47 денари, што е потенцијален принос од 20 отсто во споредба со последната цена на обичната акција истргувана на берзата (податоци до четвртокот, вчера имаше нов раст на цената на акцијата за 10 %). Кај приоритетната акција на „Стопанска банка“ Скопје тој сооднос е уште попримамлив со оглед на тоа што соодносот на вредност е 2 наспрема 1 во корист на приоритетната акција. И приносот би бил 94 денари за акција односно 35 отсто од последната пазарна цена на приоритетната акција. Податоците покажуваат дека банката бележи извонредни резултати од работењето. Има силен раст на нето приходите од камати кои изнесуваа 1,52 милијарди денари (24,7 милиони евра) и тоа е повисоко за 143,7 милиони денари во споредба со лани. Овој резултат е остварен при речиси исто ниво на приходи од камати како и минатата година. Знајачно зголемување оваа банка има и кај нето приходите од провизии и надоместоци и тоа изнесува 43,5 милиони денари, а нивото на тие приходи годинава е 478,8 милиони денари. Солиден резултат банката годинава има и кај ставката за резервации за кредити кои се сомнителни и тешко наплатливи. За таа намена за првите шест месеци се резервирани 309,4 милиони денари, а лани за истиот период биле резервирани безмалку 200 милиони денари повеќе. Значајни рестрикции банката оствари и кај останатите расходи од дејноста каде трошоците се скратени за 37 милиони денари. Уште дваесетина милиони денари се заштедени кај ставката амортизација во споредба со лани кога тој трошок бил 74,9 милиони денари. Банката има офанзивна деловна политика ако се гледа од аспект на кредитирањето. За првата половина годинава пласманите се 50,22 милијарди денари и се зголемени за 2,15 милијарди денари во споредба со лани. Истовремено оваа банка го намалила влогот во хартии од вредност за 620 милиони денари (10 милиони евра) во споредба со истиот период лани и сега во тие пласмани има 11,35 милијарди денари. Значаен успех банката има и кај депозитите на коминтентите со исклучок на банките. Депозитната база на банката е зголемена 1,5 милијарди денари ( 24,3 милиони евра) во споредба со истиот период лани и сега изнесува 64,7 милијарди денари што е највисока депозитна база во споредба со другите две големи банки на македонскиот пазар на капитал. Потенцијалните обврски на банката во споредба со лани се намалени за 800 милиони денари и изнесуваат 11,5 милијарди денари.