Стопанска банка Скопје за пола година направи 26,8 милиони евра нето приход од камати!

Добивај вести на Viber

Добивката на банката за првата половина од годинава е 17,8 милиони евра и тоа се најдобри полугодишни резултати од постоењето на банката досега Нето приходите од камати на „Стопанска банка Скопје“ во првата половина од годинава пораснале за 142 милиони денари во споредба со истиот период лани и изнесуваат 1,66 милијарди денари ( 26,84 милиони евра). Ова е убедливо најголема и најважна приходна ставка во деловното работење на една од двете најголеми македонски деловни банки. Од тој износ дури 1,1 милијарди денари (17,8 милиони евра) се добивка за првата половина од годината. Во споредба со истиот период лани добивката од работењето на банката е зголемена за неверојатни 35 отсто! Јакнењето на позитивните пазарни резултати, јакнењето на пазарната позиција, зголемувањето на кредитните пласмани во континуитет се аргументи кои ќе ги засилат шпекулациите во инвеститорската заедница дека грчката банкарска групација НБГ се подготвува за продажба на својата македонска инвестиција. Билансот на успех покажува дека освен од камати, банката успеала да оствари и солиден нето приход од провизии и надоместоци и тоа во износ од 469,9 милиони денари што е речиси идентично со ланското остварување. На расходната страна банката бележи намален износ за резервации на своите пласмани. Тие изнесуваат 251,9 милиони денари, а кредитирањето во првите шест месеци годинава во однос на истиот период лани пораснало за 1,71 милијарда денари до износ од 53,11 милијарди денари. Наспроти растот на кредитирањето се намалува износот за резервации за 57 милиони денари односно за 18,4 отсто. Вложувањата во хартии од вредност се речиси без промена во однос на истиот период лани. Нивното ниов е 11,83 милијарди денари и тие се за 70 милиони денари поголеми од истиот период лани. Втора по големина расходна ставка, по останатите расходи, се трошоците за вработени. Износот за првата половина од годинава е 387,3 милиони денари односно „Стопанска банка Скопје“ за своите вработени одвоила 24,5 милиони денари повеќе од тоа што било платено лани. Паричните средства и еквивалентите за првата половина годинава се пониски за 1,96 милијарди денари од лани и изнесуваат 16,49 милијарди денари. Тенденција на пад е забележлива и кај депозитите на клиенти и тоа во износ од 858 милиони денари во однос на истиот период лани. Така за првата половина од годинава на крајот на јуни состојбата со депозитити на граѓани, компании, здруженија и други правни лица изнесува 65,05 милијарди денари. Р.Ф.