ТАРАВАРИ И МЕМЕДИ ЗА ТРИМЕСЕЧНОТО БЕБЕ: „Родителите и медицинската сестра си подале рака на помирување“

Добивај вести на Viber

Министерот за здравство Арбен Таравари се уште го чека извештајот од Комисијата формирана на универзитетската Клиника за детски болести во врска со случајот со наводно повреденото тримесечно бебе со модринки по телото на оваа клиника, за што вчера само бил брифиран од новоназначениот директор на таа Клиника Реџеп Мемеди.

-Се надевам дека мерките што ќе ги преземе Комисијата заедно со директорот ќе се ефектуираат, а ако се повтори, јас мислам дека тогаш веќе веднаш треба да се исклучи медицинскиот кадар. Не верувам дека постои здравствен работник којшто би бил подготвен да повреди дете од три месеци. Да бидеме внимтелни. Очекувам писмено да ги прочитам сите констатации од Комисијата од Клиниката за педијатрија па повторно ќе ве известам, рече Таравари во Собранието во изјава за медиумите каде учествуваше на седница на собраниската Комисија за здравство.

Прашан за кого се води дисциплинска постапка во врска со случајот, тој рече дека таа е покрената за две лица, од кои една е медицинска сестра.

Директорот на Детската клиника истакна дека немало апсолутно никаква намера на медицинската сестра за нанесување повреда, туку тие модринки на раката настанале при процедурата земање венска крв за анализи на 11 јули.

Тој објасни дека земањето крв било реализирано од страна на две медицински сестри, а како последица на механичкиот притисок настанале хематомите на десната надлактица и подлактица, но како што рече вчера се сретнале родителите на бебето и медицинската сестра.

Родителите се покажале доблесни и медицинската сестра изразила спремност дека настанот е повеќе последица на погрешна комуникација и си подале рака на помирување, а тука завршила и работата на комисијата која го истражувала случајот.