Тендерџии од Кичево го преземаа еден од најпознатите хотели во градот?

Добивај вести на Viber

„Перпарими“ и „Линди“, локални фирми од Кичево познати уште по тоа што се добитници на јавни набавки од оваа општина, минатиот месец регистрирале фирма „Хотел Керчова“ на истата адреса на која се наоѓа „Хотел Кичево“.

Се претпоставува дека нови газди на „Хотел Кичево“, еден од најпознатите хотели во градот и најпопуларен за правење свадби, се Сабит Џабироски и Касум Реџепи, сопствениците на „Перпарими“ и „Линди“. Џабироски и Реџепи се наедно управители на новата фирма со дејност „хотели и слични објекти за сместување“.

Инаку „Хотел Кичево“ важи за угостителски објект кој како подружница е во сопственост на една од најголемите фирми од Кичево - Марготри Груп во сопственост на Горан Трипуноски. Марготри Груп минатата година оствари втора најголема добивка како кичевска фирма во висина од 1.105.000 евра.

Марготри Груп и Трипуноски го поседуваат и хотелот „Голден Вку“ во рамки на комплексот „Парк “ на охридското крајбрежје. Останува отворено прашањето дали на Трипуноски повеќе му одговара други да ги менаџираат угостителските подружници, бидејќи од неодамна компанијата за игри на среќа „Макотен“  се подготвува таму да го отвори казиното „Фламинго“, при што регистрираше рецепција за издавање на хотелски апартмани.

Инаку во работењето на „Перпарими“ основна дејност е изградба на станбени и нестанбени згради, а во делокругот на работа влегува и сепарација за дробен камен. Во името на „Линди“ пак пишува дека фирмата се занимава со градежништво, производство, трговија, сообраќај и угостителство. Џабироски е од Стрелци, додека Реџепи живее во Зајас.

Инаку покрај „Хотел Кичево“, најпознати хотели во овој град се Хотел Арабела, Хотел Унион, Хотел Куќа на уметноста и Атва Резиденс хотел.

А.К.