ТЕНКОТ Е ДО МЕНЕ, МНОГУ Е БЛИСКУ, ВЕ МОЛАМ СПАСЕТЕ МЕ: Девојче во Газа моли за помош

Добивај вести на Viber

Се појави аудио снимка на девојче кое е заробено во Газа и моли за помош. 

„Тенкот е до мене… доаѓа кон мене… многу е блиску. Дојдете… те молам, спаси ме! Сите се мртви“, вели девојчето. 

Станува збор за Хинд Раџаб, девојче кое има 6 години и исчезна во Газа на 29 јануари по нападот на нејзиниот семеен автомобил, во кој загинаа нејзините роднини. Во застрашувачка снимка девојчето очајно повикува на помош откако останало заробено во автомобил со безживотните тела на шест члена на семејството.

Мајката на шестгодишното девојче, кое сѐ уште се води за исчезнато во центарот на Газа, со денови стои пред болницата со надеж дека ќерка ѝ ќе пристигне „во секој момент“, пишува Би-би-си.

Се верува дека Хинд е единствената преживеана од седумте патници во автомобилот. Нејзината судбина сè уште не е позната, како и судбината на двајцата палестински работници на Црвената полумесечина, кои тргнале да ја спасат, а со кои е изгубен секаков контакт.

Над 27.000 Палестинци досега загинаа во Газа. На 7 октомври лани, палестинската терористичка група Хамас почна со напади на Израел. Хамас бараат формирање на независна држава Палестина со главен град Ерусалим, но и ослободување на палестинските затвореници.