ТИ-М бара одговорност од надлежните за недомаќинското трошење пари во МОН
Објавено во: Финансии 26 Октомври, 2016
Откако државната ревизија во МОН откри дека недомаќински се трошеле пари од Транспаренси Интернешенел побараа надлежните инситуции да постапат по наодите од конечниот извештај .
„Имајќи предвид дека Извештајот на Државниот завод за ревизија содржи основани сомневања за сторени неправилности кои во себе содржат обележја на одредени кривични дела, загрижувачки е тоа што надлежните институции сè уште не реагираат на нив. Го повикуваме ДЗР согласно Законот за државната ревизија да го достави извештајот до Државната комисија за спречување на корупцијата и до ЈО на Р. Македонија со цел за нивно натамошно надлежно постапување“, велат од Транспаренси.
Се јадело, пиело и вработувало без мерка?
Недомаќинско трошење за ресторани и хотели од 5 ѕвезди, користење на превоз на сметка на државата надвор од работно време, ангажирање на лица во кабинетот на министерот вработени во други институции, а без согласнос од Министерството за финансии, ова се дел од наводите на државниот ревизор по извршената ревизија во Министерството за образование и наука.
По основ на ангажирање лица без согласност од Министерството за финансии, ревизорот се сомнева дека 173.000 евра буџетски пари се незаконско потрошени. На 7 административни службеници вработени во министерството им се исплатени плати во износ од 40.000 денари иако нема докази дека присуствувале на работа, вели ревизорот. 26 хонорарци се ангажирани без согласност од Финансии, во кабинетот на министерот, без јасно и прецизно дефинирани обврски и работни задачи. За нив исплатени се 70.000 евра во текот на 2015 година, стои во извештајот.
Од Државната комисија за спречување на корупцијата тврдат дека го разгледуваат извештајот на Државниот завод за ревизија и дека ќе излезат со свои препораки по наодите, додека пак министерот за финансии Кирил Миноски, вели дека не е запознаен со случајот.
„Треба внимателно да го погледнам извештајот. Државниот завод за ревизија треба да го достави до нас и ќе го разгледаме извештајот“, вели Миноски.
Ревизорот утврдил несовесно постапување на дел од вработените што резултира со незаконско и ненаменско користење на буџетските средства.
Побарување на вработените по основ на дадени аванси за службени патувања во најголем дел се застарени, вели ревизорот.
Во текот на 2015 година без постапка за јавна набавка извршени се набавки на стоки и услуги од 8 милиони 349 илјади денари, со што е прекршен законот за јавни набавки, вели државниот ревизор. Сето ова се случувало кога министер за образование беше Абдилаќим Адеми.