ТОДОР КУЛАКОВ: Дванаесетгодишна казна е награда за вакво најбрутално можно убиство во сообраќајот

„Животот одамна е докажано дека нема вредност според законите на оваа недржава. Дванаесетгодишна казна е награда за вакво најбрутално можно убиство во сообраќајот“, изјави Кулаков пред Кривичниот суд Скопје, по објавувањето на пресудата за прегазувањето на неговата ќерка во јануари годинава на булеварот „Партизански одреди“ во Скопје.

Кулаков порача дека не се откажуваат и дека разбирливо ќе протестираат ако треба барајќи оставки. 

„И Бог нека им суди и пресуди. Ние не се откажуваме“, порача Кулаков. 

Првиот впечаток кога влегол во судницата, како што рече, бил дека родителите на Васил Јованов биле тотално релаксирани.

Судијката Снежана Марковска, на објавувањето на пресудата денеска во Основниот кривичен суд Скопје рече дека како олеснителни околности Судот ги ценел признанието на вина и чувството на вина, како и свесноста за степенот на кривичното дело што го сторил и последиците, возраста и немањето доволно искуство, поранешениот живот - активен студент и спортист и неговото однесување по сторувањето на делото,  додека како отежнителни интензитетот на дејствијата и прекршување на голем број бланкетни норми од Законот за сообраќај, како и степенот на опасност од предизвикување на ова дело и тоа што обвинетиот е претходно осуден на казна затвор од три години и десет месеци за недозволена трговија со дрога и фактот што против него пред судот се отворени уште неколку постапки за поминување на црвено и загрозување на животот на пешаците и целосно игнорантскиот однос кон нив.

Претходно, по загинувањето на девојката имаше протести во Скопје и во Неготино.