Топ 20 економски оператори

Добивај вести на Viber

Дури пет компании во Македонија заработиле повеќе од една милијарда денари од учествата во јавните набавки за една година, според извештајот што го објави оваа недела Бирото за јавни набавки, по официјалната обработка на податоците за 2019.

На првото место е ТЕ-ТО АД Скопје со 1.697.187.065 денари. Најголем дел од сумата најверојатно се должи од тендерот за природен гас кој компанијата го добива за потребите на „Балкан Енерџи“.

На второто место е Македонски Телеком со 1.330.278.474 денари, а трет е Алкалоид Конс со 1.189.236.464 денари. Во петте „милијардери“ се уште и трговецот со горива Пуцко Петрол со 1.179.900.207 и операторот кој е најпознат по ископот на јаглен за РЕК Битола, Марковски Компани, со 1.143.253.065 денари.

На листата на Бирото високо котираат и Никоб со над 890 милиони, ОКТА со 860 и словенечката Iskraemeco, која е позната по своите технички уреди за електрична енергија, со 855 милиони.

Може да се каже дека една година претходно имаше многу покрупни добитници. Станува збор за компании кои главно работеа на капиталните инвестиции како Гранит и Рапди Билд со по околу три милијарди денари. Блиску беа и Градежен институт Македонија и Бетон АД - првите со безмалку две милијарди, вторите со 1,6.

А.К.