ТРЕНЧЕВСКА: Верувам дека ќе најдеме решение за минималната плата, во буџетот има пари за решението да биде финансиски поткрепено

Добивај вести на Viber

Верувам дека на денешното продолжување на социјалниот дијалог на Економско - социјалниот совет ќе го донесеме најсоодветното решение, кое ќе биде прифатено од сите социјални партнери. За нас како Влада подобрувањето  на економскиот статус на работниците е врвен приоритет и минималната плата ќе биде зголемена, рече министерката за труд и социјална политика Јованка Тренчевска во денешното интервју на ТВ 24. Министерката посочи дека е оптимист и оти ќе се изнајде најдоброто решение за работниците, работодавачите и на Владата како партнери.

„Верувам дека на Економско - социјалниот совет предлогот ќе биде прифатен од сите социјални партнери. Кога имаме конструктивен дијалог на ЕСС, секогаш доаѓаме до решение кое е најдобро за сите вклучени страни. Буџетот е во добра кондиција и секое предложено решение ќе биде поткрепено со финансии“, рече министерката Тренчевска.

Министерката Тренчевска посочи дека барањето на Сојузот на синдикатите кое го поддржуваат и другите синдикати, е реално бидејќи е согласно трошоците на живот и потрошувачката кошничка.

Синдикатите бараат 18.000 денари минимална плата или 62 отсто од просечната плата. Организацијата на работодавачи бара донесување на минимална плата со 50 отсто од просечната плата, Бизнис конфедерацијата на Македонија предлага обезбедување на финансиска помош за исплата на минималната плата од буџетот на РСМ.