Три милиони Грци се без здравствено осигурување – Ситуацијата е алармантна

Добивај вести на Viber

Невработените во Грција добиваат надоместоци за само две години и многумина не можат да соберат сили да ги плаќаат здравствените придонеси . Бесплатната помош, предложена од хуманитарни организации, е опција, но не и решение на проблемот, пишува Дојче Веле. Во клиниката на хуманитарната организација "Лекари на светот " во Атина пациентите не плаќаат надомест за прегледот. И лековите се бесплатни - тие се набавуваат преку донации. Медицинските сестри, лекарите и присутните работат на доброволна основа - во слободно време и без надомест. Константинос (60), кој се движи со патерици, вели дека освен болното колено, има и чир на желудникот. Тој е од оние  пациенти кои поради недостаток на средства, немаат здравствено осигурување. „Цела среќа е дека тука не треба да се плаќа за лековите и прегледите", вели тој. „Примав инвалидска пензија, но потоа едноставно ја запреа и ми рекоа да си барам работа. Каква работа да почнам, кога сум осакатен?", прашува тој. Без пензија , без работа - во Грција тоа значи и без пари за придонеси во здравствената каса. Невработените добиваат државна помош за максимум две години , па оттука натаму не можат да се потпрат на поддршка - освен на помош од семејството или на социјалните кујни. Оние кои со години се без работа и поради тоа не можат да плаќаат придонеси во здравствената каса , остануваат и без здравствено осигурување. Таква е судбината на многу Грци. Теодорос Параскевопулос од грчката опозициска партија „Сириза" го вклучи алармот: „Три милиони луѓе немаат здравствено осигурување, тоа е една четвртина од грчкото население". Грчката влада тврди дека оваа бројка е напумпана, но дури и да е така , не може да се негира дека се повеќе луѓе остануваат без право на медицинска услуга : не добиваат лекови во аптеките, болниците не ги прифаќаат. Психотерапевтот Александрос Сувацис работи на доброволна основа барем осум часа неделно во клиниката на "Лекари на светот". Знае доволно приказни за болни луѓе, за кои државните болници остануваат затворени: "Случаите стануваат се повеќе . Кај нас доаѓаат многумина, претежно постари, на кои итно им е потребна операција. Државните болници одбиваат да ги прифатат, бидејќи немаат здравствено осигурување. Ако ние не им помогнеме, ќе мора да ги поднесуваат болките". Теодорос Параскевопулос вели дека му се познати случаи на пациенти кои умреле , бидејќи ги одбиле за здравствена помош во болница . Тој инсистира владата веднаш да усвои закон кој ќе ги обврзе болниците и лекарските ординации да им пружат медицинска помош на луѓето без здравствено осигурување. Таков закон треба да се прифати итно, бидејќи прашањето е на живот и смрт, во буквална смисла на зборот : "Време нема - потребни се итни мерки , за да може секој човек да има право на здравствени услуги ", категоричен е Параскевопулос.   А.А.