Тридневен штрајк се заканува да ја парализира Европа! Летовите се откажани

Добивај вести на Viber

Аеродромот Завентем во Брисел објави дека нема да има летови за заминување во среда, 26 ноември, поради тридневен национален штрајк на белгиските синдикати.

Се очекува и откажување на некои дојдовни летови, пишува „Бруселс тајмс“.

Синдикатите протестираат против најавените мерки за штедење на владата, вклучително и промените поврзани со пензионирањето.

Ова е седми пат од почетокот на годината синдикалните акции да го нарушат воздушниот сообраќај во земјата.

Управата на аеродромот изјави дека прекините ќе бидат „значајни“, бидејќи дел од безбедносниот и диспечерскиот персонал учествува во штрајкот.

Авиокомпаниите директно ќе ги информираат патниците за откажаните летови и можните алтернативи во наредните денови.

Откажаните летови ќе бидат прикажани на официјалната веб-страница на аеродромот само откако авиокомпаниите ќе направат промени во системот.

Во моментов нема информации за тоа како штрајкот ќе влијае на аеродромот Шарлроа.

Според портпаролот, повеќе детали се очекуваат во текот на неделата.

Тридневниот штрајк ќе започне во понеделник, 24 ноември, кога ќе биде суспендирана железничката работа, додека сите јавни услуги ќе штрајкуваат следниот ден, вторник.