„УМИРААТ 14.000 ЛУЃЕ ГОДИШНО ПОРАДИ ДВЕ ВИРУСНИ ИНФЕКЦИИ“: Мора да се зголеми опфатот на вакцинација апелира ЕК

Добивај вести на Viber

Европската комисија денеска им препорача на земјите-членки да ја засилат вакцинацијата со две клучни вакцини кои можат да спречат вирусни инфекции кои можат да доведат до рак.

Тоа е вакцина против хуманиот папиломавирус (ХПВ) и вирусот на хепатитис Б (ХБВ).

Препораката е дел од европскиот план за борба против ракот, клучен столб на Европската здравствена унија. Се проценува дека околу 40 отсто од случаите на рак во ЕУ може да се спречат.

Сепак, според новиот извештај објавен денеска, само околу 5 отсто од вкупните здравствени трошоци во 2021 година биле наменети за превенција во земјите-членки на ЕУ.

„Годишно се губат 14.000 животи“

„Секогаш е подобро да се спречи отколку да се лекува. Секоја година во ЕУ се губат речиси 14.000 животи од рак на грлото на матката, а се пријавени повеќе од 16.000 нови инфекции со хепатитис Б“, рече комесарката за здравство Стела Киријакидес. Таа додаде дека безбедните и ефективни вакцини даваат историска можност да се искорени ракот на грлото на матката и другите видови на рак предизвикани од овие вируси.

Со цел да се елиминира ракот на грлото на матката и другите видови на рак предизвикани од ХПВ, како што се одредени видови на рак на главата и вратот и други форми на аногенитален карцином, европскиот план за борба против ракот поставува цел за земјите-членки да достигнат стапка на вакцинација до 2030 година од 90 проценти против ХПВ кај девојчињата и значително да се зголеми вакцинацијата на момчињата.

Планот за борба против ракот, исто така, има за цел да обезбеди пристап до вакцинација против ХБВ, особено за спречување на рак на црниот дроб. Овие вакцини се од суштинско значење за заштита на јавното здравје и поддршка на еластичните здравствени системи, вели Комисијата.

Вакцинација помала од 50 проценти

За да се постигне поставената цел, останува уште многу работа бидејќи во повеќето земји-членки покриеноста со вакцинација против ХПВ кај девојчињата е значително помала од 50 проценти, додека има многу ограничени податоци за момчињата. Недостигаат податоци и за стапките на вакцинација против ХБВ, велат од Комисијата.

Со цел да се подобри ситуацијата, Комисијата, меѓу другото, препорачува земјите-членки да обезбедат бесплатна вакцинација или надомест на трошоците, да го олеснат пристапот до вакцинација за посебно целните групи и ранливите или ризичните популации. Исто така, се предлага земјите-членки да вклучат вакцинација во нивните национални планови за борба против ракот.

Се препорачува и подобра комуникација за борба против дезинформациите за ефектот од вакцините.