Унгарската опозиција ја испрашуваше власта за третманот на Груевски
Објавено во: Македонија 19 Ноември, 2018
Во унгарскиот парламент, денеска за време на седница за пратеничките прашања, е побаран одговор за постапката за азил на осудениот екс-премиер Никола Груевски, пренесува порталот 24.hu.
Опозицијата побара одговор потсетувајќи дека според унгарскиот закон, специјален третман за барател на азил следува само ако станува збор за малолетник без придружба од возрасно лице, бремена жена, самохран родител, жртва на сексуално насилство, личност со инвалидност или друг вид попреченост.
Опозицијата во Националниот парламент Унгарија ја доведе во прашање политиката на азил на власта поради аферата.
Државниот секретар во канцеларијата на премиерот Виктор Орбан, Балаж Орбан, пак, одговори дека поранешниот македонски премиер Груевски поднел барање за азил, без да наведе во која земја го доставил барањето и дека унагрските власти не биле инволвирани во неговото бегство од Македонија, а барањето е прифатено за разгледување од „безбедносни причини“.
Тој побарал од опозицијата да престане со „кампањата на дезинформирање“ во врска со случајот, особено со прашањата зошто Груевски не се наоѓа во транзитната зона.
„Правилата на граничните процедури не мора да бидат применети на лица со посебен третман“, вели Балаж Орбан.
Според унгарските медиуми се потврдува специјалниот третман кој го има Груевски од властите, кои велат дека тоа му е овозможено затоа што бил премиер 10 години.