Варуфакис: Може да останеме без пари уште 2 недели

Добивај вести на Viber

Грција доби поддршка од еврозоната за напредокот во преговорите, но и предупредување дека Атина ќе се соочи со криза, ако за две недели не биде постигнат договор.

Владата на Атина собрала доволно пари за да ја изврши исплатата кон ММФ во износ од 750 милиони евра и да избегне банкрот, кој би можел да го ослаби еврото. Но министрите за финансии од еврозоната предупредија дека облаците над Грција нема да исчезнат, додека земјата не ги изврши клучните реформи.

„Го поздравуваме напредокот што е постигнат досега. Во исто време признаваме дека е потребно повеќе време и напор за да се надминат преостанатите отворени прашања“, се вели во соопштението на Еврогрупата по крајот на средбата во Брисел вчера.

Грчкиот министер за финансии Јанис Варуфакис призна дека Атина се соочува со непосредна криза. „Прашањето со ликвидноста е ужасно итен. Тоа е општо познато, нека не го заобиколуваат“, изјавил поранешниот професор по економија, Варуфакис. Тој посочи дека од гледна точка на времето станува збор за „следните неколку недели“.

Според него кризата ќе дојде, ако за две недели неговата земја не добие итна транша од спасувачката програма во вкупен износ од 240 милијарди евра. Тој одби да го коментира предлогот на германскиот министер за финансии Волфганг Шојбле за референдум во врска со реформите.

„Тоа е инструмент на располагање на грчката влада, но во моментов не е на дневен ред“, изјави Варуфакис.