Винаријата „Стоби“ ги спои убавото вино и забавата на кроењето на првата лоза за Св. Трифун

Добивај вести на Viber

Во присуство на голем број гости, членови на дипломатскиот кор, црковни великодостојници, преставници од бизнис сферата, деловни соработници и медиуми, првата винова лоза во винаријата Стоби, локалитет Градско, свечено ја закрои сопственикот на винаријата, господинот Минчо Јорданов. Долгата македонска традиција вели дека со закројувањето на лозите родот ќе биде богат и ќе се произведе добро вино. Токму затоа, по повод празникот Св. Трифун, заштитникот на вината и винарите, се одржа споменатото традиционално закројување лозови насади. „14 февруари кај нас во винаријата Стоби, како и во целиот Тиквешки регион се слави празникот „Св.Трифун“ посветен на светецот заштитник на лозјата и градините. Денеска се посакуваат добро здравје и богат род на лозјата. Така и ние, по петти пат по ред се радуваме на почетокот на новата сезона и верни на традицијата и обичаите, закроивме три лози со благословот „Дај Боже бериќет“ – истакна Ана Јорданова, член на надзорниот одбор на винарија Стоби. Гостите на овој настан имаа и прилика да ја разгледаат целата винарија Стоби низ турата организирана од домаќините, а и секако да уживаат во високо квалитетните вина. За атмосферата и доброто расположение се погрижија Дани, Летечки Пекинезери и DJ Џон Антонио. „Претходната година, иако беше исполнета со предизвици, од аспект на родност на виновата лоза, сепак Стоби винарија, благодарение на напредната технологија, искуството и знаењето од енолошки аспект, успеа да постигне одлични резултати. Го зголемивме пазарниот удел на домашниот пазар, зацврстувајќи ги нашите позиции, но истовремено и се проширивме на нови пазари. Сега сме присутни во над 20 земји ширум светот. Освоивме значајни признанија и награди на бројни натпревари,меѓу кои и на најпрестижните како „Мундус Вини“ и „Декантер“ – изјави Дане Јованов, директор на винаријата Стоби.