Добивај вести на Viber
Владата денеска планира да се задолжи со скоро 114 милиони евра. Според објавените Проспекти на Министерството за финансии, станува збор за аукција на краткорочни хартии од вредност со рок на доспевање од 6 месеци и од 1 година. Во зависност од валутата и рокот на доспевање, Владата нуди каматна стапка од 3,10%, 3,15 % и 3,60%.
Според последните септемвриски податоци, Јавниот долг на Централната влада достигна скоро 2 милијарди и 700 милиони евра или за еден месец, од август до септември се зголеми за близу 9 милиони евра. Од оваа сума, надворешен долг изнесува 1,6 милијарди евра додека внатрешен долг 1,1 милијарда евра. Според податоците на Министерството за финасии, во септември е регистриран пораст на внатрешното задолжување што владата го спроведува преку продажба на државни хартии од вредност. Така, заклучно со деветтиот месец од годинава, државата на домашните кредитори им должи скоро 1 милијарда евра.
Во исто време и податоците на народната Банка укажуваат на раст на Бруто Надворешниот долг кој изнесува 5,6 милијарди евра. Неодамна гувернерот на Централната банка, Димитар Богов изјави дека и по овие податоци, Македонија останува умерено задолжена земја.