Владата стокми 288 милиони евра кредити од Дојче и Светска Банка, СДСМ порача – нема да помине!

Добивај вести на Viber

За само еден ден Владата се задолжи со нови 288, 7 милиони евра кај Светска Банка и кај Дојче Банк. Собранието вчера експресно, речиси без расправа ги одобри новите задолжувања, од кои дел ќе влезат веднаш, а дел по нова година, со цел да се покрие, прво овогодинешната буџетска дупка, а потоа да ги поткрепи расходите за идната година. Светска банка Владата се задолжи со 50 милиони долари ка Светска Банка.  Целта на овој заем е да се обезбедат средства  за буџетска поддршка. Клучните активности кои ќе се поддржат со овој заем се поделени во четири области и тоа: -Развој на производство со висока додадена вредност; -Олеснување на преструктуирањето на земјоделскиот сектор; -Подобрување на ефикасноста на услугите на трговската логистика; -Воспоставување флексибилност на пазарот на труд, развој на вештини и иновација. Дојче банк Кредитот од Дојче банк, пак предвидува заем во износ од 250 милиони ЕВРА, со гаранција од Светска банка во износ од 155 милиони ЕВРА, рок на отплата 7 години- отплатата ќе се врши на две рати, при што првата рата во износ од 95 милиони ЕВРА ќе биде отплатена на денот на достасување кој паѓа 5 години од денот на повлекување на средствата на заемот, додека втората рата во износ од 155 милиони ЕВРА ќе биде отплатена на денот на достасување кој паѓа 7 години од денот на повлекување на средствата. СДСМ: Власта е спремна на се да ги грабне парите И додека Собранието набрзина ги изгласа законите СДСМ обвини дека за кусо време Владата се задолжила без стратегија за развој на земјата. -Сето ова што се случуваше во парламентот, кршењето на деловникот, законот и уставот, тепањето и исфрлањето на пратениците од опозицијата надвор од Собранието, како и насилната цензура на новинарските слободи, власта го направи само за пари, и тоа за многу пари, за преку 400 милиони евра само во овој краток период. Со тоа власта покажа, дека за да ги грабне парите, спремна е сè да направи. Тие пари на власта и се потребни за да си обезбеди поддршка за своето опстојување“, рече Јовановски. Јавниот долг на земјата неодамна надмина 30 проценти од БДП, а поранешниот гувернер Петар Гошев предупреди дека вкупниот јавен долг е многу поголем и дека заедно со долговите на општините и фондовите надминува 45 % од БДП. Власта ги игнорираше пораките од Гошев. Задолжувањата и буџетот беа главна тема деновиве и причина за најавената голема политичка криза откако пратениците на СДСМ беа отстранети од парламентот за да може да се изгласа буџетот. Д.А.