ВЛАДАТА СО ОДГОВОР: Груевски ќе ја отслужи казната во Македонија

Добивај вести на Viber

Од Владата велат дека осудениот екс премиер, Никола Груевски ќе ја отслужи казната во Република Македонија. 

Владата очекува дека властите во Будимпешта безусловно ќе го прифатат барањето за екстрадиција и ќе овозможат враќање на Груевски во Македонија, со цел да си ја отслужи казната затвор и да одговара за останатите дела за коишто е обвинет. Од Владата посочуваат дека Груевски е осуден во јавен и транспарентен процес и негираат дека тој во ниту една ситуација нема пријавено закани по неговиот живот.

„Никола Груевски е осуден со правосилна пресуда во јавен и транспарентен процес, а истовремено против него се водат уште неколку судски постапки, истраги и уште една предистражна постапка. Осудениот Никола Груевски беше под полициска заштита согласно со правата кои му следуваа како поранешен премиер и тој во ниту една ситуација нема пријавено закани по неговиот живот“, стои во соопштението од владината прес-служба.

Против  Груевски, наведуваат дека никогаш не бил воден никаков политички прогон и не се евидентирани никакви закани по неговиот живот, ниту пак која било владина институција вршела закани по неговиот живот.

Владата на Република Македонија официјално покрај протестната нота доставена вчера за улогата на амбасадите на Унгарија во неговото бегство од земјата и официјално ќе испрати барање за екстрадиција проследено со севкупната документација за процесите и пресудата.

„Владата на Република Македонија очекува дека властите во Будимпешта безусловно ќе го прифатат барањето за екстрадиција и во согласност со почитувањето на меѓународното право како земја членка на ЕУ и НАТО ќе овозможат враќање на Груевски во Македонија со цел да си ја отслужи казната затвор и да одговара за останатите дела за коишто е обвинет“, стои во соопштението.

Секој оној за кој се докажало дека ги прекршил законите и секој оној за кој има правосилна пресуда, ќе одговара за своите постапки, посочуваат од Владата. 

Никола Груевски на Фејсбук попладнево информираше дека му е одобрен азил и напиша дека имало закани за негова ликвидација во земјава.