ВМРО-ДПМНЕ ќе се соочи со уште посилна министерска тројка
Објавено во: Македонија 14 Јули, 2023
По шефовите на дипломатиите од Австрија, Чешка и Словачка, нова тројка на министри за надворешни работи, овојпат од Франција, Германија и Полска ќе дојде во Северна Македонија за да ја образложи важноста од уставните измени пред ВМРО-ДПМНЕ за продолжување на европскиот пат на Македонија.
„Францускиот дипломат е најважно да дојде. Франција треба да биде на некој начин толкувач на овие одредби што ги има. Јас очекувам, и тоа сум им го кажал на Французите, ако утре било што од ова што го кажувам - дека протоколите не се дел од одредниците, дека тие не може да бидат пречка, јас ќе ја повикам Франција да биде толкувач на тоа, затоа што со нив е направен овој договор", изјави министерот Османи на ТВ 24.
Според Османи, повторно во Скопје по само неколку месеци германската министерка за надворешни работи Аналена Бербок ќе биде дел од новата европска министерска тројка која ќе го посети македонскиот главен град за да укаже на важноста на уставните измени.
Делегација на ВМРО-ДПМНЕ и Коалицијата за обнова на Македонија, предводена од претседателот на ВМРО-ДПМНЕ, Христијан Мицкоски, а во чиј состав беше и раководството на ВМРО-ДПМНЕ, како и пратениците од пратеничката група на ВМРО-ДПМНЕ и Коалицијата за обнова, вчера во Собранието остварија средба со Александар Шаленберг, министер за надворешни работи на Австрија, Јан Липавски, министер за надворешни работи на Чешка и Мирослав Влаховски, министер за надворешни работи на Словачка.