ВМРО-ДПМНЕ најави голем антивладин митинг
Објавено во: Македонија 14 Мај, 2018
ВМРО-ДПМНЕ на 2 или 3 јуни во Скопје ќе одржи голем народен митинг против актуелните владини политики. Од партијата велат дека оваа Влада ја води државата во погрешна насока.
ВМРО-ДПМНЕ е во една внатрешна реорганизација, а по неа се планираат силни теренски активности.
Потпретседателот на ВМРО-ДПМНЕ, Александар Николоски вели дека во партијата во тек е избор на локални раководства односно на претседатели на општински комитети и на раководства на општинските комитети кои се основен двигател на нашата политичка партија.
„Потоа планираме силни теренски активности, а дел од нив е и големиот народен митинг. Меѓу граѓаните, сакаме да ја пренесеме нашата порака, да ги претставиме нашите концепти кои ги градиме како ново раководство на ВМРО-ДПМНЕ. Да дадеме јасна критика на Владата и сериозно да го подготвиме членството и симпатизерите, но и да ги поканиме неопределените да ни се приклучат во една силна битка која што ја поведуваме против оваа Влада“- вели Николоски.
Опозициската ВМРО-ДПМНЕ смета дека задолжувањето планирано за утре, во вредност од 16 милиони евра, претставува показател дека владеењето на СДСМ нема капацитет да ја води државата.