Добивај вести на Viber
Хрватската Влада на Твитер објави дека се откажува од данокот на додадена вредност на телефонските повици за хуманитарната акција за поплавените подрачја.
Целата сума од ДДВ-то ќе биде исто така уплатена на сметката за помош на погодените региони. „Сите средства од ДДВ на телефонските повици за хуманитарните активности за поплавите, Владата на Хрватска ќе ги пренасочи кон примателите на донациите“, објави Владата во Загреб на Твиер.
Ваквата реакција во Хрватска уследи откако граѓаните реагираа затоа што на нивните хумани повици за спас на погоденото население, Владата си задржува ДДВ.
Слични реакции имаше и во Македонија, откако на граѓаните кои донираа 100 денари со телефонски повик за населението погодено од катастрофални поплави, им стигнаа пораки дека дополнителни 18 денари им се задржуваат за ДДВ.
Засега нема официјални информации дали македонската Влада ќе го следи примерот на хрватската и ќе се откаже од ДДВ-то за еден хуман гест.