ВО ЈУНИ ПОЧНУВА ИЗДАВАЊЕТО НА ГРАЃАНСКИТЕ ОБВРЗНИЦИ – Ќе може да се тргуваат на берза, но и каматата ќе биде примамлива

Добивај вести на Viber

Од наредниот месец ќе се издаде првата граѓанска обврзницата. Со неа, според очекувањата на министерот за финансии, Фатмир Бесими, во буџетот ќе влезат 50 милиони евра, а со тоа ќе им се овозможи на граѓаните нов финансиски инструменти. Тој истакна дека со издавањето на граѓанската обврзница се прошируваат финансиските инструменти во земајва.

-  Како што и претхоно најавувавме во план е издавање на други обврзници, како што е граѓанската, развојна и зелени обврзници. Прво почнуваме со граѓанската, која не се воведува поради празна државна каса, туку се прошируваат финансиските инструменти. Со ова ќе им се овозможи на грашаните да купуваат обврзници со кои ќе можат да тргуваат на берзата. Ова е всушност проширување на финансискиот пазар, и се планира веќе две години. Годинава започнуваме, а ќе објавуваме секоја година. Со ова граѓаните ќе можат да ги користат парите кои ги имаат заштедено за купување обврзница, а потао тие пари ќе се искористат за инвестиции. Ова е начин да се зачува вредноста, бидејќи во инфлација парите ја губат вредноста. Во обврзницата тие ќе бидат заштитени – појаснува министерот Бесими.

Тој на брифингот пред новинарите потенцираше дека предвидено е овие обврзници прв пат да се издадат во јуни месец, со две години рок.

-  Сметавме дека со ваква обврзница ќе може да се влијае врз инвестициите. Една обврзница ќе чини 10 илјади денари, а со нивното издавање очекувањата се дека би се собрала сума од 50 милиони евра. Сепак, ќе потенцирам дека ова не се прави за да се соберат пари за буџетот, бидејќи и кај банките има доволно средства да се позајмат. Повеќе се воедува како инструмент за граѓаните да имаат можност да инвестираат и со цел развој на финансискиот пазар. Граѓаните знаат дека во инфлација се намалува вредноста на парите, со инвестиција во обврзница вредноста ќе биде заштитена. Каматата на граѓанската обврзница уште не е дефинирана, но ќе биде повисока од каматите на депозитите на банките. Со тоа граѓаните би добиле повеќе отколку да ги чуваат парите во банките, а државата би се задолжила помалку отколку да позајмува од странство – појаснува Бесими.

Воедно министерот укажа дека обврзницата ќе може да се тргува на берзата, со што граѓаните кои имаат купено обврзница, а не можат да го чекаат рокот од две години за поврат на средствата, можат да си ги повратат парите преку продажба на берза.

-  Сметаме дека ова е вин-вин состојба за сите. Граѓаните ќе имаат финансиски инструмент кој е сигурен, нема да чуваат пари на страна. Исто така знаеме дека многу наши сограѓани кои работат во странство – дијаспората, купува недвижнини, станови кои стојат празни, а цените растат. Сега ќе имаат друг начин за инвестиции – заклучува Бесими.

П.О.