Втор заем за два дена

Добивај вести на Viber

Македонија ќе земе заем во висина од 24 милиони долари од Светска банка за поддршка на развојот на вештините и иновациите. Проектот бил одобрен вчера од Бордот директори на Светска банка, а целта била да ја подобри транспаретноста во распределба на ресурсите и да ја промовира одговорноста во високото образование, подобрување на релевантноста во средното техничко стручно образование и поддршка на иновативните капацитети во Македонија. Од проектот корист ќе имаат околу 24.000 студенти и 1.500 наставнички и управен кадар од училиштата за техничкото стручно образование, кои ќе добијат нови наставни програми и подобрување на условите за практична обука, како и обука за управување, планирање и подобрување на процесот. „Заради подобрување на перформансите на земјата на пазарот на труд, како и економската конкуретност ќе има потреба од работна сила со подобри вештини и подобро образование“, истакнува Татјана Проскурјакова, директор на Канцеларијата на Светска банка во Македонија. „Проектот е дизајниран да ги поттикне образованието и вештините кои се релевантни за пазарот на труд, како и да го подобри иновативниот капацитет на земјата“, вели Бојана Нацева, виш специјалист за образование при регионот на Европа и Централна Азија на Светска банка и лидер на проектот. Заемот за поддршка на развојот на вештините и иновациите е издаден од страна на Меѓународната банка за обнова и развој (ИБРД) и изнесува 24 милиони долари, со 18 години доспевање и 5 години грејс период. Светска банка пред два дена објави извештај во кој ги пофали активните политики за вработување на македонската влада и изрази очекување дека приватниот сектор во земјава наскоро ќе започне да создава работни места. Во изминатите години преземени се доста реформи во делот на политиките за вработување и очекуваме да видиме резултати, се оценува во Извештајот на Светска банка за Европа и Централна Азија „Назад на работа: Раст со работни места во Европа и Централна Азија“, кој беше презентиран во Скопје. Вчера Македонија зеде заем од 97 милиони евра и од Банката за развој на Советот на Европа. Управниот одбор на Банката го одобрил задолжувањето, кое треба да биде искористено за реновирање на клиниката „Мајка Тереза“ од Скопје и Регионалната клиничка болница во Штип.