Yahoo обвинет за родова дискриминација, ама против мажите
Објавено во: Финансии 08 Октомври, 2016
Yahoo се соочува со голема тужба од поранешни вработени кои тврдат дека компанијата под водство на шефицата Мариса Мајер водела политика на родова дискриминација, но против мажите за кои се правеле обиди да бидат избркани од работа. Втор кој ќе поднесе тужба е Скот Ард, поранешен заменик уредник на Yahoo, кој смета дека Мајер користела нелегални методи да го отпушти, а слична судбина доживеале и повеќе мажи од управата.
Претходно и Грегори Андерсон, уредникот за автомобили на Yahoo поднесе тужба за родова дискриминација и неправилен систем на оценка на перформансите на работното место кој немал никаков надзор од управата и бил волонтерски поставен од директорката Мајер.
Керолин Кларк, портпаролката на Yahoo соопшти дека тужбите немаат никаква основа и дека процесот на евалуација по квартали бил реален и правилен иако двајцата вработени пред да се воведе овој систем добивале позитивни оценки и бонуси во акции.