За „Антикорупциска“ дипломите на шефот на тајната полиција Христовски се чисти

Добивај вести на Viber

Државната комисија за спречување на корупција (ДКСК) нема надлежност да ја проверува валидноста на дипломите на директорот на Агенцијата за национална безбедност, Бојан Христовски.

На денешната седница „Антикорупциска“ одлучи дека нема надлежност за директна експертиза на дел од документите со кои шефот на тајната полиција е поставен на функција.

Според пријавите, постојат сомневања за законитоста на безбедносната проверка, валидноста на дипломата за високо образование, сертификатот за англиски јазик и работното искуство на Христовски. Подносителите бараа ДКСК да ги преземе сите потребни дејствија за утврдување на одговорност за корупција и судир на интереси.

Опозициските партии тврдеа дека дипломата од Универзитетот за туризам и менаџмент на Христовски има материјални повреди, а дипломата за англиски јазик е од неовластено бугарско студио во Пловдив.

Институциите до ДКСК доставиле уверение за државјанство, уверение за завршени студии за високо образование седми степен, одлука за одбрана на магистерски труд, уверение за испити положени од прв циклус, доказ за работно искуство, доказ за познавање на англиски јазик како и изјави во однос дека нема забрани за вршење професија, ниту привремена мерка за вршење дејност, како и изјава дека не е член на политичка партија и дека не му е утврдено постоење судир на интереси. Според ДКСК, сите доставени податоци биле во насока на исполнување на критериумите.

-Врз основа на сомнежите за валидноста на приложените документи, ДКСК постапувајќи по своите надлежности побара вонреден инспекциски надзор од Државниот просветен инспекторат во наведениот факултет со цел проверка на приложените уверенија и дипломи за стекнати 240, односно 180 кредити. ДПИ постапи и достави допис во кој се констатира дека нема неправилност во работењеото на универзитетот, односно приложените уверенија и дипломи се издадени во согласност со законски прописи, рече комисискиот член Цвета Ристовска. 

Во врска со условот за 12 години искуство од кои пет години на раководни функции, од ДКСК информираа дека од страна на владата е доставен доказ дека има работно искуство.

-Со прилози од Агенцијата за вработување, договори за вработување и решенија за негово именување, лицето ги исполнува законските барања за работно искуство, дополни Ристовска.

Додека, во однос на условот да поседува еден од меѓународно признати сертификати за познавање на англиски јазик, не постар од пет години, оттаму посочија дека лицето поднело сертификат издаден во 2022 година кој формално правно ги исполнува законските критериуми.

-Поради сомневање за автентичноста за наведениот сертификат, ДКСК истакнува дека нема овластување да проверува и утврдува автентичност на документите кои бараат експертиза надвор од надлежностите на ДКСК, согласно закон. Надлежноста е на основно јавно обвинителство каде што е доставена кривична пријава, а документот е валиден додека не се докаже спротивното, посочи Ристовска.

Според ДКСК, валидни се и условите да не му е изречена забрана за вршење професија, да не е член на политичка партија и да има исполнето безбедносна проверка. 

-Од Владата беше доставен доказ дека е спроведена безбедносна проверка, дека лицето има сертификат за безбедносни информации. Безбедносната проверка била спроведена за неговото претходно работно ангажирање во МВР. Овој сертификат ги задоволува условите до моментот на преземање на функцијата директор. Со преземањето е спроведено тестирање со степен на доверливост државна тајна. Спроведувањето на оваа процедура ја потврдува дополнително усогласеноста на лицето со функцијата, рече Ристовска. 

Во однос на условот да не е поведена постапка за постоење на судир на интереси, во документацијата е доставена изјава со која изјавува дека не му е утврдено постоење на судир на интереси, според која ДКСК смета дека е исполнет и тој услов.