За година и пол – електронски патарини

Добивај вести на Viber

За 18 месеци треба да биде имплементиран новиот модернизиран електронски систем за наплата на патарините во Македонија - стои во договорот што денеска го потпиша Јавното претпријатие за државни патишта и турската компанија „Аселсан“, која ќе го изведува проектот. Инвестицијата ќе чини 18,7 милиони евра и предвидува во иднина значително да се намали застојот на патарините по Коридорот 10. Имено, со новиот систем се предвидува комплетно електронска наплата преку бесконтактни смарт-картички и микробранови транспондери со кои возачите ќе можат да поминуваат со намалување на брзината на движење без застанување. Освен ова, предвидено е преместување, проширување и модернизација на наплатните рампи Петровец, Сопот, Отовица, Романоввце и Градско, како и изградба на две нови наплатни рампи кај Демир Капија и Гевгелија. Според министерот за транспорт и врски Миле Јанакиески, електронскиот систем за наплата нема да ги остави без работа вработените на наплатните рампи. „Ниту еден вработен во Јавното претпријатие нема да остане без работа. Вработените воопшто нема да бидат вклучени во наплатата на патарините затоа што самиот систем не се базира на кеш. Смарт картичките ќе се полнат на наплатни пунктови во близина на патарините и сигурно дека ќе има вклучени лица во сервис“, појаснува Јанакиески. Цената на патарините нема да зависи од новиот систем. „Потпишувањето на договорот е  уште еден исчекор на Владата во насока на вложување во транспортната инфраструктура  и тоа токму на најзначајната транспортна артерија низ Македонија – Коридорот 10 низ кој минува 70 проценти од вкупната трговија на стоки  низ државава“, вели вицепремиерот и министер за финансии Зоран Ставрески. Според  претставниците на „Аселсан“, системот кој треба да го спроведат е веќе применето решение во пракса за автоматска  наплата на патарини и се користи повеќе од 15 години во услови на  густ сообраќај во Турција, а во Македонија ќе биде воведено ново, уште помодернизирано решение.