За проблематични кредити се врзани 427 милиони евра, подобри денови во второто полугодие!

Добивај вести на Viber

Драматично ниска стапка на кредитен раст во првите четири месеци од годинава. Од јануари до април – кредитната активност на ниво на целиот банкарски сектор изнесува само 1 отсто. Оваа бројка ја отвора дилемата дали до крајот на годината ќе се оствари проекцијата за кредитен раст од 7 проценти. Според пресметките на банкарите, за да се реализира проектираната стапка, до крајот на годината вкупните кредити треба да се зголемат за цели 300 милиони евра. Првиот човек на банкарското здружение и директор на НЛБ Тутунска Банка, Ѓорѓи Јанчевски вели дека податоците за економски раст во првиот квартал навестуваат оптимизам, но посочува дека растот треба да продолжи за да се рефлектира и во банкарскиот сектор. „Доколку стопанството има пораст тоа се одразува и кај кредитите за компаниите и кај кредитите за населението. Оптимистички е што во првиот квартал, Македонија излезе од онаа „статус-кво“ ситуација, пришто е регистриран раст од 2,9 %, а тоа на некој начин ќе биде сигнал и да пораснат кредитните активности. Доколку се продолжи тој тренд, се очекува и проектираните 7 % на раст на кредитите до крај на годината да се остварат“ - изјави Јанчевски. Заклучно со мај, вкупните кредити изнесуваат 3,6 милијарди евра, од кои на кредити на домаќинства отпаѓаат 1,4 милијарда евра, а на кредити на приватен и јавен сектор 2,1 милијарда евра. Нефункционални кредити Додека кредитирањето се движи со „лазечко“ темпо, расте бројот на нефункционални кредити. Најновите податоци на Народната Банка покажуваа дека заклучно со мај овие кредити достигнаа ниво од 427,5 милиони евра или 11,9 отсто од вкупниот кредитен пласман. Процентот на раст на проблематичните кредити се зголемува и кај приватниот сектор и кај граѓаните. Трендот на раст на проблематичните кредити од април се прелеа и во мај. Само за пет месеци или од јануари до мај, салдото на нефункционални кредити е зголемено за 381,6 милиони евра. “Сеуште трае тој тренд на пораст. Делумно, причината е поради намалени кредитни активности. Кога има поголема кредитна активност процентуалниот дел на нефункционални кредити се намалува во вкупниот износ на активности. Сега имаме минимален раст односно пад на кредитните активности и тоа се одразува и на нефункционалните кредити, кои сеуште се во рамките на толерантен износ.“ - оценува претседателот на Здружението на Банкари, Јанчевски. За годинава, Народната Банка проектираше кредитен раст од 7 отсто. Заклучно со мај приливите по основ на наплатена камата изнесуваат 80,5 милиони евра. А.Д.