За првпат во Македонија – осигурување од земјотреси

Добивај вести на Viber

Со промоција на првиот уникатен производ за осигурување од земјотрес, во Македонија започна да функционира новиот систем за осигурување од природни катастрофи и временски непогоди, поддржан од компанијата Европа Ре. Анализите јасно покажуваат дека земјите од ЈИЕ се исклучително ранливи на поплави, суши и други појави предизвикани од климатски промени, како и на ризици од змејотреси, лизгање на земјиште и слични елементарни непогоди, вели вицепремиерот и министер за финансии Зоран Ставрески. Како пример, тој наведе дека материјалните штети од земјотресот со кој што беше погодено Скопје во 1963 година изнесуваа над 10 отсто од БДП на тогашната СФРЈ. „За илустрација колкава е таа ранливост говори податокот на Светска Банка дека претпоставените економски штети кои може да ги претрпи Македонија и нејзината економија од евентуални слични елементарни непогоди, би можеле да достигнат и до 40 отсто од БДП на земјата, што е над 2 милјарди долари“, вели Ставрески. Годишно, отштетите од временски непогоди секоја година го чинат македонскиот буџет околу 90 милиони денари. Затоа Владата е еден од идејните творци на системот за осигурување од природни катастрофи. Пет милиони американски долари, земени на заем од Светска банка, Владата ги вложила во специјализирана регионална компанија за осигурување и реосигурување на ризиците од катастрофии Европа Ре. Според генералниот директор на компанијата Хајнц Фоленвајдер, веднаш по лансирањето на првата полиса за осигурување од земјотреси, ќе следува иновативно осигурување во земјоделството, кое, како придобивка за македонските фармери, ќе обезбеди долгорочна финансиска гаранција при евентуални загуби на нивниот род од некоја временска неприлика. Новите иновативни осигурителни производи, први од ваков вид во земјата, ќе се продваат преку постојните локални осигурителни компании, кои ќе земат учество во Европа Ре програмата.