Задолжувањето расте, Владата смирува, опозицијата предупредува на грчко сценарио

Добивај вести на Viber

Иако 2012 та почна со ниво на јавен долг од 26,1% од бдп, во третиот квартал почнува тренд на позначајно задолжување, особено на домашен терен, со што стапката се доближува прво 30 % од БДП, за денес да стаса до максималните 32,1 % што е највисоката измерена стапка во последните пет години. Ова значи дека за неполна година долгот порасна за околу 6 процентни поени. Токму на крајот од 2012 та во јавноста се отвори жестока дебата за тоа колку навистина е задолжена државата дома и во странство и дали владата дозирано ја информира јавноста за состојбата со долговите. Поранешниот гувернер и еден од поранешните министри за финасии, Петар Гошев, како и академик Абдулменаф Беџети тврдеа дека податоците за вкупниот јавен долг, кои не се достапни на јавноста, покажуваат дека тој изнесува повеќе од 45 отсто од БДП. Станува збор за долговите и на Фондовите и општините, кои сега не се прикажуваат во податоците за долгот на Централна Влада што ги објавува Министерството за финансии. Власта и опозицијата изминатите месеци остро се конфронтираа за задолжувањата. Според опозицијата Владата  неоправдано ја задолжува државата, оставјќи им на наредните генерации долг што нема да може да се отплати, а некои предвидувања одеа дотаму што на Македонија и се предвидува грчко сценарио веќе во втората половина од годинава. Дел од експертите сметаат дека земените пари не се трошат за развојни проекти кои ќе обезбедат нови вработувања и економски развој, туку за згради и споменици. Владата, пак тврди дека Македонија се уште има меѓу пониските нивоа на Јавен долг во Европа, и дека земјата е се уште далеку од црвената линија на задолжувањето од 40 % од БДП. Премиерот Груевски неодамна посочи дека Јапонија на пример има долг кој изнесува 220 % од БДП. Оваа година почнува со ново задолжување од 250 милиони евра зад кое како гарант стои Светска банка. Законот за задолжување владејачкото мнозинство го изгласа без присуство на опозицијата во парламентот, откако претходно на ист начин го усвои и буџетот за 2013 та година.