ЗАДОЛЖУВАЊЕТО РАСТЕ, БАНКИТЕ „ПООТВОРЕНИ“ КОН КОМПАНИИТЕ – се менуваат ли трендовите во секторот

Добивај вести на Viber

Граѓаните и компаниите од домашните банки подигнале кредити во вредност која надминува 7,8 милијарди евра. И најновите податоци кои ги сподели Народната банка на Македонија покажуваат дека кредитното задолжување кај граѓаните и кај компаниите во земјава продолжува да расте.

Согласно податоците за месец ноември, вкупните кредити се зголемени за 0,7 проценти во споредба со претходниот месец. Ако се погледнат податоците малку порано, ќе се види дека на годишно ниво задолжвуањето се зголемило за 9,7 проценти. Притоа, месечниот и годишниот раст се резултат на зголемените кредити на двата сектора, со поголем придонес кон растот на кредитите на корпоративниот сектор.

Бројките откриваат дека компаниите на банките им должат 3,7 милијарди евра, додека домаќинствата должат благо над 4 милијарди евра.

-  Кредитите на корпоративниот сектор , во ноември, остварија месечно зголемување од 0,8 отсто коешто се должи на зголеменото кредитирање во денари и во странска валута, со поголем придонес на кредитите во денари. Споредено на годишна основа, растот од 11,5 проценти во целост произлегува од зголемените кредити во денари, во услови на пад на кредитите во странска валута – нагласуваат од Народна банка.

Воедно од централната банка дополнуваат дека кога се кредитите на граѓаните во прашање, таму бил забележан раст од 0,7 проценти на месечна основа. Додаваат дека има скоро сличен раст меѓу кредитите во странски валути и во денари. На годишно ниво, кредитите на домаќинствата пораснале за 8,2 отсто, кој во голем дел се должи на кредитите одобрени во денари.

-  Според намената на кредитите одобрени на физичките лица, во ноември, најзастапените категории − потрошувачките и станбените кредити бележат месечно зголемување од 0,7 отсто и 1,2 проценти. Годишен раст од 7,3 отсто и 11,6 проценти, соодветно. Овој месец, автомобилските кредити се намалија за 0,7 проценти на месечна основа, додека на годишна основа растат за 10,8 отсто. Кредитите одобрени на кредитни картички, во ноември, забележаа месечен и годишен пад од 1 процент и 9,2 отсто. Во ноември, негативните салда на тековните сметки и кредитите одобрени врз други основи бележат месечно намалување од 4,7 отсто и 0,3 проценти, соодветно, при остварено годишно намалување од 4,8отсто и 14,3проценти – укажуваат од централната банка.

Од Народната банка оценуваат дека депозитите и кредитите бележат солидни стапки на раст и движењата засега се подобри од очекувањата за последниот квартал од годината.

Банкарите исто така неодамна пресметаат дека просечната каматна стапка на вкупните кредити во октомври за корпоративниот сектор изнесува 5,09 отсто и е намалена за 0,06 п.п. на месечно ниво.

-  Анализирано по валута промената се должи на намалувањето кај сите компоненти: каматните стапки на денарските кредити со валутна клаузула, каматните стапки на кредитите во странска валута и каматните стапки на денарските кредити без валутна клаузула. Споредено на годишно ниво, каматната стапка на вкупните кредити на корпоративниот сектор е намалена за 0,28 п.п. Каматната стапка на новоодобрените кредити на корпоративниот сектор изнесува 4,65 отсто и оствари месечен пад од 0,13 п.п – укажуваат банкарите.

П.О. 

Фото: Фактор