Заев: Ги информираме Грците за измените кои ги бараат опозициските пратеници

Добивај вести на Viber

Премиерот Зоран Заев за медиумите изјави дека редовно ја информира грчката страна за сите амандмански измени во Уставот што се планира да се направат надвор од Спогодбата во Пресдпа а во согласност со барањата на опозициските пратеници кои се приклучија кон двотретинското мнозинство.

-Знаете дека е консултирана и грчката страна. Тоа не е обврска од Договорот, но во духот на партнерството и пријателството ред е да презентираме што македонскиот Парламент ќе одлучува во периодот што доаѓа, затоа што е тоа нацрт фаза и во текот на расправата по самите уставни амандмани може да се надополнуваат со амандмани. Значи, на јавната расправа и на конечната верзија на амандманите што ќе дојдат.  Верувам дека до петок ќе стигнеме со сите неопходни консултации, истакна премиерот Заев.

Тој изрази увереност дека во процесот на помирување ќе се приклучат сите пратеници од опозицијата за да се направат потребните реформи.

-Секој може да има свој аспект, ние сме демократска влада. Јас го почитувам начинот на разгледување, на посветеност да се постигне конечната цел, а тоа е еден вид национално обединување-интеретничко и интраетничко што ни треба во Македонија. Јас зборувам за помирување, не зборувам за амнестија. Помирувањето, како процес, ќе го видите преку едно координативно тело во Собранието каде што ќе работи на севкупното сегашно помирување, но и перспективите што се отвораат пред Македонија. Како ќе се носат одлуките ние тоа ќе го соопштуваме во јавноста, но едно знам – настаните од 27 април се одлична можност да го изградиме тоа помирување. Има многу убави и демократски познати модалитети како тоа да се прави, но низ системот, низ ова координативно тело, треба токму тоа да го правиме. Тоа е само еден мал сегмент затоа што е добро што почнува од Парламентот како врв на демократијата и највисока институција во РМ за да може да го очекуваме и по вертикала надолу до општините, па дури до последната клетка на нашето опшетство, а тоа е семејството, рече Заев.