Заев: Моето семејство се занимаваше со земјоделие, затоа што на тој начин се вадеа пари
Објавено во: Македонија 30 Март, 2018
На денешната прес-конференција во Владата на Република Македонија, на тема земјоделие премиерот, Зоран Заев, им испрати пораки на граѓаните дека Македонија има плодно земјиште кое, треба да се искористи за да се зголеми производството на здрава храна.
Заев го посочи своето семејство како пример дека секој може да се занимава со земјоделство, за дополнителна заработувачка.
„Од бога ни е благословено поднебјето. Ако луѓето немаат мотив да се занимаваат со земјоделство тенденциите ќе бидат опаѓачки. Годинава нема галама, бунтови, штрајкови кај земјоделците, но ова е краткорочно, мора да осигураме профит на долг рок. Еве како пример, татко ми беше магационер во „Зиг Струмица“, а мајката ми наставник, ние сите се занимававме со земјоделие, затоа што на тој начин се вадеа пари, дополнително, екстра. Мораме тоа да го поттикнеме со соодветни политики во земјоделието кои ќе продуцираат ефект“, изјави Премиерот Заев
Тој додаде дека со земјоделство може да се занимава и инженер, политичар или наставник, затоа што, рече, тоа е она што Македонија го нуди.
„Не може во Србија шест тони жито на хектар, а во Македонија три тони. Исто така мораме субвенциите да ги даваме на време, оти ако не ги даваме на време со нив земјоделците ќе си плаќаат струја. Мораме да отвориме нови пазари за пласман. Ќе увеземе нафта, железо, газ, но треба и да го продадеме тоа што имаме за возврат“, рече Заев.