Заев најави реакција по тврдењата на БАН дека македонски јазик не постои

Добивај вести на Viber

Македонија ќе реагира по ставовите на Бугарската академија на науките (БАН) дека македонскиот јазик е дијалект на бугарскиот јазик, најави денеска премиерот Зоран Заев.

„Ќе реагираме поради тоа што тоа прашање е дел од прашањето за решавање на проблемите помеѓу Република Северна Македонија и Бугарија во Договорот за добрососедство и пријателство. Првите чекори се направени. Верувам дека тоа мораме да го решиме. Јас не ја знам реакцијата, сега ја слушам од вас. Секако ќе реагираме и преку МНР и ќе ги направиме сите наши коментари откако ќе прочитаме што е самата реакција“, изјави Заев. 

Македонскиот јазик не постои, зашто е писмено-регионален стандард на бугарскиот, се вели во реакцијата на Бугарската академија на науките.

Контроверзниот став е своевиден одговор на Повелбата на македонските колеги, усвоена пред 10 дена од МАНУ, во која се изнесени научно признаени факти за македонскиот јазик, а во насока на зацврстување на потребата за научно истражување на македонскиот јазик и дијалекти.

За БАН таквиот документ е неприфатлив и неточен, а дека македонскиот е бугарски јазик напишан на српска машина. 

„Документот предизвикува многу сериозни научни забелешки. Затоа, беше дискутиран од страна на раководството на Бугарската академија на науките, по што беа побарани и презентирани мислењата на три институти на Академијата - Институтот за бугарски јазик, научниот центар Кирил и Методиј и Институтот за историски студии", се вели во пораката од раководството на БАН.

Во него се наведува дека добиените мислења биле поддржани и од индивидуалните позиции на членовите на Собранието на академици и соодветните членови на БАН.