Заев: Не гледам причина изборите да се одложат
Објавено во: Македонија 11 Март, 2020
Лидерот на СДСМ, Зоран Заев вели дека не е добро да се одложат изборите, нема таква причина, на лидерската средба ќе прецизираме каков вид кампања ќе се води.
„Навистина ги следиме трендовите дури од жариштата од каде што почна од Кина, работите се смируваат веруваме дека и кај нас ќе се смируваат, но до тогаш сите сме должни без разлика дали сме политички лидери на победничка коалиција да ги послушаме државните органи, целта на повикот е препораката од Министерство за здравство и премиерот Спасовски не повикува лидерите на поголемите политички партии за да разговараме околу моделите на водење на кампањата, веројатно да ни укаже на нас лидерите, а да пренесеме и на коалиционите партнери каков вид на кампања е дозволива и што е препорачливо како да се придржуваме до сите задолженија, како и оние препораки што се од страна на државните институции за да можеме да го исполниме тоа што граѓаните од нас го очекуваат, да ги промовираме нашите програми, нашите кандидати, визии и слично, а притоа да се испочитуваат сите задолженија и препораки од државните институции, тоа е целта. Јас лично не гледам на ниту еден начин, ниту било која причина за изборите да се одложуваат“, вели Заев.
Додава дека тоа е целта која сакаат да ја постигнат и не е добро да се одложат изборите, напротив тие треба да се одржат.
Вели дека сите државни ресурси се подготвени, екипирани и парламентот е распуштен, веќе е подготвено се она што е претходна постапка и е завршено.
„Сега можеби коронавирусот ќе не стави во позиција на некои поинаков вид на кампања, секако електронските медиуми се на располагање, интернет можностите се на располагање, видео стримови и така натаму, можеме да ги поставиме и верувам дека ќе допреме до граѓаните, важно е граѓаните да знаат за што ќе гласаат, да знаат што ќе бираат и како да изберат, важно е да ги промовираме сите наши поединци и пратеници, програми, визии и детали околу целата работа за да може да излезат, затоа што важно е граѓаните да излезат, успешноста на изборите не е исто дали ќе биде со 45 отсто или со 75 отсто“, рече Заев.
Утре ќе се одржи лидерска средба на која ќе се разговара за вирусот, кампањата, и изборите кои треба да се одржат на 12 април.