Заев откри како реагирале Мицкоски и Иванов за Илинденска Македонија
Објавено во: Македонија 15 Октомври, 2018
Според премиерот Зоран Заев, не се точни обвинувањата на опозициските пратеници дека опозицијата не била вклучена во процесот на преговори.
Тој ова денеска во Собранието го негираше. Заев вели дека секоја информација од преговорите била отворено и чесно споделена со лидерот на ВМРО-ДПМНЕ, Христијан Мицкоски, и со претседателот на државата, Ѓорге Иванов.
„Не ни е лесно, ниту на нас Владата, ниту на вас опозицијата. Разговорите за предлогот „Илинденска Македонија“ уште еднаш беа потврдени на финишот на преговарачкиот процес. Причините беа промена на Уставот за внатрешна употреба. Тука беше веќе издебатирано, но веднаш беше одбиено од Мицкоски, а Иванов даде позитивен потстрек, не беше дециден, но позитивна беше дискусијата“ – рече Заев.
Тој додаде дека предлогот пропаднал затоа што бил одбиен и од грчката страна, иако Заев и грчкиот премиер, Алексис Ципрас првично го прифатиле.
Премиерот уште еднаш испрати апел до опозицијата дека сега е момент за обединување околу ЕУ и НАТО.
Заев вели дека не сака ни да помисли што може да се случи ако се затвори вратата на евроатланското семејството.