Заев: Потписите се обезбедени, да ги договориме и министрите за новата влада

Добивај вести на Viber

Зоран Заев, претседателот на СДСМ е во официјална посета на БиХ со сестринската социјал-демократска партија каде имаат работен состанок, по кој изјави дека е многу блиску до формирање на нова влада во Македонија.

- Еве вака, синоќа знам дека раководството на ДУИ донесе одлука да ги обезбедат потписите и да ги дадат, поради тоа што како второ рангирана партија бевме условени од претседателот на државата Ѓорѓе Иванов да обезбедиме потписи за да ни биде даден мандатот, по нашиот Устав тој треба да го даде веднаш мандатот. Сега се веќе обезбедени потписите за давањето на мандатот, јас верувам дека остануваат мал дел од преговорите околу формирањето на Влада, заради тоа што најзначајните прашања, а тоа се идната владина програма, платформата на социјалдемократите, платформата на албанските политички партии, законот за употреба на јазиците се усогласени. Тоа беа суштествените работи, останува да седнеме со претседателите на другите партии да се договориме за ресорите, за кадрите во делот на Владата и верувам дека за некои 10-15 дена Македонија ќе има нова Влада предводена од Социјалдемократите, изјави Заев.

Заев исто така посочи дека наесен повторно ќе ја посети Босна но, во улога на премиер на државата.

- Во Македонија се одржаа кредибилни и регуларни избори, не беа тие до крај фер и демократски, но немаше фалсификат на самите избори, што е многу значајна работа пред `се заради граѓаните, заради кои работат и постојат политичарите и политичките партии. Со социјалдемократите од Босна и Херцеговина имаме многу што да соработуваме. Ние се познаваме и лично, нашите раководства се долгогодишни пријатели и можеме многу што да пренесеме како искуство. Секако денеска потврдив дека на есен ќе бидеме јас и раководството на мојата партија присутни овде во Сараево на една голема регионална средба на социјалдемократите, социјалистите и левичарите, генерално од целиот овој регион, за да размениме искуства, но се надевам дека Македонија ќе биде една убава, позитивна порака за целиот регион, дека е возможно партиите со лева ориентација, социјалдемократите, повторно да добијат шанса од граѓаните и полека да ги нормализираат сите овие национализми, па и радикализми што `се повеќе се појавуваат во мултиетничкиот Балкан, изјави Заев пред босанските медиуми.