ЗАГИНА ТРЕТОТО НАЈВАЖНО ЛИЦЕ НА ХАМАС: Вашингтон ја потврди смртта на Марван Иса

Добивај вести на Viber

Израел тврди дека го елиминирал и третото најважно лице на палестинската терористичка група Хамас. 

Вашингтон ја потврди смртта во операцијата на заменик-шефот на военото крило на „Хамас“ Марван Иса. Тој е највисокиот претставник на палестинското исламистичко движење убиен од израелската армија во Појасот Газа од почетокот на војната пред речиси половина година.

Израелската армија објави дека убила десетици палестински борци и уапсила повеќе од 200 луѓе во голема операција вчера во најголемиот болнички комплекс во Појасот Газа - болницата „Ал Шифа“, пренесоа француските медиуми. Стотици цивили беа принудени да ја напуштат областа.

„Елиминиравме повеќе од 20 терористи во болничкиот комплекс и над 20 во областа околу болницата“, изјави портпаролот на израелската армија, контраадмирал Даниел Хагари. 

Министерството за здравство во Појасот Газа извести за „десетици убиени и ранети, од кои повеќето цивили, во операцијата на израелската војска во болницата „Ал Шифа“, но не даде точни бројки. Американскиот државен секретар Антони Блинкен оваа недела ќе го посети Блискиот Исток, соопшти Стејт департментот.Неговата посета е во рамки на напорите на Вашингтон да посредува за прекин на огнот меѓу Израел и Хамас во Газа.

Од 7 октомври досега загинаа над 31.000 Палестинци. Хамас на 7 октомври лани изврши напади на Израел и војната уште трае.