ЗЕЛЕНСКИ ПРЕДЛОЖИ ЗАКОН: Ќе им се одземе државјанството на Украинците кои имаат и руски пасоши

Добивај вести на Viber

Украинскиот претседател Володимир Зеленски бара да им се одземе државјанството на Украинците кои имаат и руски пасоши. 

Тој поднесе предлог-закон до парламентот со кој на Украинците ќе им се одземе државјанството доколку добијат руски пасош. Истиот закон го олеснува стекнувањето украинско државјанство за оние кои се бореле на страната на Украина против Русија.

Иницијативата, опишана како „итна“ е ставена на парламентарен преглед од Зеленски во понеделникот. Таа има за цел да воспостави неколку услови под кои на Украинците може да им се одземе државјанството.

На возрасен човек може да му се одземат сите соодветни права ако тој или таа „доброволно стекнал државјанство на агресорот или државата окупатор“. Истото може да се случи со секој кој е во служба на таа земја или на кој било начин учествува во она што е опишано како „вооружена агресија“ против Украина. 

Нацрт-законот предлага да им се дозволи на граѓаните на повеќе од 30 земји, главно западни, да аплицираат за украинско државјанство по поедноставена процедура доколку се обврзат дека ќе се откажат од своето поранешно државјанство во рок од две години.

Истата брза процедура може да ја користат и оние кои служеле во украинската војска и неколку други владини агенции или кои исполнуваат посебни услови преку заслуги.

При презентирањето на нацрт-законот, Зеленски, истакна дека тој може да им дозволи на сите етнички Украинци и нивните потомци ширум светот – со исклучок на оние од „државата агресор“ – да добијат државјанство.

Русија почна да дава државјанства на жителите на регионите Доњецк и Луганск по брза процедура уште во 2019 година. 

Во септември лани, руското Министерство за внатрешни работи откри дека издало повеќе од 2,8 милиони пасоши на луѓе кои живеат на поранешните украински територии и предвиде во тоа време дека бројот ќе се зголеми за уште 400.000 до крајот на годината.

Во февруари 2023 година, новинската агенција ТАСС исто така објави дека околу 5,3 милиони бегалци, вклучително и повеќе од 700.000 деца, дошле во Русија од Донбас и Украина од почетокот на конфликтот на почетокот на 2022 година.

Во септември 2022 година, Киев усвои нацрт-закон со кој се наметнуваат долги затворски казни за државните службеници кои добиваат руски документи, како и за оние кои ги принудуваат или поттикнуваат луѓето да станат руски државјани. Руската инвазија на Украина почна на 24 февруари 2022 година.